समारु अउ मंगलू के गोठ

।।समारु अउ मंगलू के गोठ ।।

"अलकरहा गदर -फदर मांस -मछरी ,साप- बिछी ,चिरई  चुरगुन, फाफा- मिरगा ,मेकरा- माछी  ,चमगेदरी -समगेदरी अउ कुकुर माकर मन ल मिंझार के खाही त उकर मुडा न इ पुरही ग । सवाद लगाके खाय मं  ये कोरोना महामारी फइले  हवे गा । जनामना मनसे ल हाही आगे हवे जतका जिनिस हे सब कमती हे। उनखर बर अब भुगतत हे अउ  हमु मन ल भुगतावत हवय।"

तरिया पार मं दतुवन घीसत समारु कहिस , त ओकर बोली के चिबोली देवत मंगलू कहे लगिस -

"अउ मंद -संद पी  खाके टुरा- टानकी मन के खुल्लम -खुल्ला चुमई -चटई  ह‌र निपोर ओखी के खोखी कर दिस ।"

तय हर यार मंगलू एकदमेच फोर के कहिथस कोनो सुन डहरी त का समझही अउ हमर इज्जत का रहि जाही ?ते पाय के अइसन गोठियाय म कनउर लगथय । समारु हर अपन संत पना अउ धीर गंभीर सुभाव  के सेती अड़ताफ में जाने जाय। त मंगलू हर अपन जोकड़ाई अउ पच -परगट कहे के नाम से सगा -सोदर मन मं जाने जाय।

       आज मउका मिलिस त उधेनतेच जात हवय ।जनामना आजेच मनरेगा के  गोदी ल  पुरो के रही ।

"सही कबे मंडल त ये कोरोना बइरी हर सब मनखे मन ल बड़ अकबका डारे हवय ।जीव ह टोटा म अरझे बानी लगथय अउ रतिहा टी बी म  समाचार  सुनबे त  करेजा मुंह म आय बानी लगथे ...! उदुक ले  आके फुदुक ले से देश भर म फइलत चले जात  हवे।

    मंगलू के गोठ के बीचेच म कहिस -'हव ग जब कहुंचो फइले नइ रहिस त कम इया -खवइया मजदूर मन ल सरकार जिहा तिहा दु दु महिना ल बिन रोजी रोजगार के धांध दे रहिस।"

   अउ जब जादा फइल गे तब सब झन लाने- लेगे बर रेल मोटर गाडी चला दिस । उन बिचारा मन के क रल ई देख रो रोवासी नई  आवय..खांध के.पंछा मं आंसू पोछत कहीस ।

"अब देखब एखर से सब राज के गांव गांव फ इलत चले जात हवय। ये हर अउ बड बिलहोरन लगत हवे! "मुखारी ल चाबत अउ सीपत समारु मंडल कहिस।

       अच्छा मंडल एकर आय ल मनसे मन छट्टा -छुट्टा होगे तौन बने बात आय।अब देख ले जर सर सर्दी बोखार मन धरत न इये भलुक सब जगा बने सुधरत जात हवे ।नदिता नरवा हवा पानी ये वातावरण जम्मों सुधरगे। पवन पुरवाई बने चलत हवय चिर ई चुरुगुन मन गाय गुवाए ल सीख गिन ।

   हा सही कहत हस अतका सुधार तो दिखत हवय  भलुक अब छट्टा सट्टा अतेक बाढगे कि बाबु पिला माई लोगन मन एक दुसर बर कुरा ससुर अउ डेढ़सास लहुट गय ।

     समारु हांसत कहिस -"बने कहेस मंगलू असने मान मरयादा म रहई हर बने आय अब  सबो झन ल असनेच रवे लगही ।"

      "नहीं मंडल तोर असन संत ल फरक न इ परत होही फेर हमर असन देहगिरहा मन बरजीअई हर अलकर लगत हवे। न भाव न भजन न पाव पैलगी । अउ त अउ असनेच रही त नसबंदी वाले मन के काम -बुता तको नइ सटक जही मंडल ?  मया -पिरित तको दुनिया ले नंदा जही लगत हवे।"ठठा के मंगलू  हांसे लगिस ।

  ओती सयकल मं आत अनिल हर उकर बताचिता ल  सुन के बिधुन हांसे लगिस -" बने बने बबा हो जय जोहार!"

 उहु मन जोहार ले  कहिन ।

थोरिक ठाड़ होके हालचाल पुछिस अउ ट्रन- ट्रन घंटी बजात/ पैडल मारत स्कूल डहन चल दिस जिहा दुसर राज ले कमाय- खाय बर गय लोगन ल १४ दिन बर क्वारंटाइन म राखे हवय,तेकर हाल -चाल जाने। 

          - डा अनिल भतपहरी 9617777514