परे हन मंझधार म

हमर सतनाम जागृति युवा मंच जुनवानी  के  जुन्ना( रचनाकाल  १९८७-८८ ) "जागृति- गीत"  जेकर क ई मंच म प्रस्तुति होत रहीस आज पुराना डायरी देखेव त मिल गय-

" जागृति गीत "

सुआ बोलत हे आमा  के डार ल

कोयली कुहकत हे नंदिया कछार म
मइना रोवत हे साजा रवार म
पडकी धुटरत हे  खारे- खार म‌ 

बिपत अइसे कि परे हन मंझधार म...

हाथी कस भारी रहेन बधवा कस रहिस बल
हमला आके लुटिस बिदेशिया करके कपट छल
छाती के रुंआ पुदगागे मेछा रीस झार म ...

तैतीस करोड देवि देवता कतकोन धरम करम
खडखड भगवान चुन नई  जानेन धरम के मरम
मानवता के रोजेच हइता सरत हन जातपात म ...

हम  बेटी वाला  छाती  फूलाय नई सकन
दहेज के मार म कनिहा सोझियाय नई सकन
बेटी रोज जरय  दहेज के आग म...

उत्ती डहर ले जरत आही
बुडती म जाके भुताही
आस हवय हमला कि धुरवा के दिन बहुराही
दुध के नंदिया बोहाही गांव गांव म ....

  -डा. अनिल भतपहरी