।।हमर गांव ।।
हमर अब्बड़ सुघ्घर गांव
तोला कइसे मंय बताव
कभु घुमे-फिरे बर आव
हमर बिक्कट सुघ्घर गांव...
होत बिंहचा कुकरा बासे
पनिहारिन के पइरी बाजे
दया मया के एहर सागर
सगा मनई बर एक मन आगर
छानी के ऊपर कौंआ करय रोज कांव कांव ...
बारी बियारा धनहा डोली
बड़ निक लागय अर्र तता बोली
करमा ददरिया सुआ पंथी
जगा जगा मं कथा कहानी
पंच अउ पटइल करय लीम तरी नियाव ...
मेड़ों म ठाकुर बीच मं जैतखाम
तरिया पार म बिराजे महामाई
उत्ती - बुड़ती म करिया धुरवा
रक्सेल म हवे शीतला माई
गांव के थोरिक दुरिहा म नाम्ही ठेंगा देवता नांव...
बिन फरिका अउ तारा के घर
बिसवास एक दूसर के ऊपर
निगे नइ सकय चोर - चिहाट
चारो मुड़ा म हवे रखवार
तरिया पार ले बाड़ी कुकुर करय हांव हांव ...
देख ले संगी बरदी धरसगे
होगें संझा घरो-घर दीया बरगे
चुरत हे भात अउ डबकत हे दार
रोजेच मनाथंय सुरहुत्ती तिहार
परसे मयारुक दाई ताते-तात खांव ...
डा. अनिल भतपहरी
जुनवानी अमलीडीह रायपुर
९६१७७७७५१४
No comments:
Post a Comment