।।नरी ल कटा लेयन ।।
सित्तो घर में खुसरे
असकटा गेयन
कोरोना के सेती
लाकडाउन मं
मछरी कस फंसे
छटपटा गेयन
छर्री- दर्री होत
बाचेन गिया
भले डर कहि ले
फेर एकेच मं
समटा गेयन
कौखन कत्कोन
बदल डरिन अवसर
आपदा ल
एक- दूसर ल
देखत हमन
सोझ रद्दा मं
हपटा गेयन
कहिबे काकर तीर
गोहराबे दु: ख काला
जम्मों तो संसो में हे
कहिके अपन पीरा ल
असनेच सलटा लेयन
चतुरा हे ओमन
तेकरे सेती
उंकर महल अटारी हे
हमन उंकरेच
धरहा आरी मं
अपन नरी ल
कटा लेयन
-डाॅ. अनिल भतपहरी
No comments:
Post a Comment