लीम चंउरा

"लीम चंउरा के पथरा"

लीम चंउरा के पथरा अबड़ चिक्कन
ओ तो जानत हवय सबके अन्तरमन ....

पंच अउ पटइल बइठ नियाव करिस
ये दे सुन्ता -सुम्मत के  नवा रद्दा सिरजिस .....

उधो अउ माधो के भाग खुलिस
सरकारी योजना म साहेब दुनो के नाव लिखिस ...

बिहने ले सांझ होथे गजब तमासा
कहुं भौंरा बाटी बिल्लस तास तिरी पासा...

मंगलू बुधयारिन के भांवर परिस
इही मेर दुनो झन के पिरित सिरजिस...

अनगंइहा मन आके इंहचे थिराथे
अपन सगा सोदर के पता ठिकाना पाथे ....

रतिहा पुनुराम दसना डिसाथे
घर के कलर कइय्या ल बाहिर फूरसुदहा सोथे ...

गांव भर के मनखे ल कोरा मं बिठाथे
सबके करु कसा ल अंतस म पचाथे ...

चढ़ावव चंदन अउ बुकव बंदन...
लीम चंउरा के पथरा अबड़ चिक्कन ...
  
-डा.अनिल भतपहरी
     अध्यक्छ
   राजभासा छत्तीसगढ़ी साहित्य समिति
चित्र - ऐतिहासिक ग्राम जुनवानी के सुप्रसिद्ध लीम चउरा  युवा सरपंच सुनील भतपहरी द्वारा भव्यतम निर्माण जो परिछेत्र में दर्शनीय है।