#anilbhatpahri
झन नंदाय कोला बारी
छत बारी मं घलव फरत हे तरकारी
ऊपजाबोन चलव साग-भाजी संगवारी
झन नंदावय हमर कोला बारी
खोचे बीजा तरोई के नार ह छछल गे
ढेखरा म चघे सेमी हांसत हे कठल के
बिहने किंदर ले मगन घीसत मुखारी ...
तुमा फरे गोल-गोल मखना चकरेठी
जीभ लमा के कइसे बिजरावय बरबट्टी
आलू बरी संग चुरय त हासय कराही ...
लजाय बानी खडे हे पतरेंगी चुरचुटिया
साजे सवांगा देख कोंवर रमकेलिया
रुप देख मोहागे अनिल भतपहरी ...
भाटा -गोभी धनिया - मिरचा लाल बंगाला
जोम जांगर बारो महिना उपजे भाजी पाला
आनी- बानी के साग रांध मगन हे सुवारी ...
- डा अनिल भतपहरी
.
No comments:
Post a Comment