हमर भांचा राम

सुने हन अजोधिया के ,राजा बनगे राम 

हमर भांचा राम, हमर भांचा राम ...

लइकुसहा ले बलखर भारी ओहर  रहिस   

तड़का ल मार  गिराइस  अउ मारीच ल खेदारिस  

साधु -संत के सेवा बर निकले लखन संग  राम ...

जनकपुर म  धनुष टोर के  बिहाइस सीता 

बहिनी कौसिलया बर  होने अड़बड़ सुभीता 

सुख म दिन बितय उंकर,  उच्छल मंगल रात ...

मुड़धुंगी कैकेयी केजबर  करवादिस बनवास 

मुरझा गे फूल डोहड़ी ह टुटगे सबके आस 

बने करिस फेर  आइन बिराजिस हमरो लंग राम ...

 

मनखे ल कोन कहय सब जीव जन्तु ल सरेखिस  

जंगल झाड़ी डोंगरी पहाड़ सब ल सुघ्घर जतनिस 

बारा बछर  ल बिताइस हमरो संग म राम ...

सिव भूमि सिरपुर म  आके भारी मान पाइस 

ये पबरित भुंइया के ओमन महिमा गाइस 

सुग्रीव संग बद मितानी पाइस सेवक हनुमान ...

सुनके मान बड़ाई ओकर  तरमरागे कपटी  रावन

छल कपट करके सीता ल हर लिस बैरी रावन 

सब पुरखा मन  संग दिस त लंका जीतीस राम ...

देवारी कस उच्छल- मंगल अजोधिया म होइन 

चलव हमु मन उकर सेती घरो घर दीया बारिन 

ओती सिंघासन म बिराजे अउ ऐती घट म राम... 

हमर भांचा हमर भांचा राम ...